"ஒரு நாணயத்தின் இரு பக்கங்கள்"

சிலோன் யுனெட்டெட் ஆர்ட் ஸ்டேஜ் குழுவினரின் "ஒரு நாணயத்தின் இரு பக்கங்கள்" என்ற நாடகம் வத்தளை நகர சபை மண்டபத்தில் அண்மையில் மேடையேற்றப்பட்டது.

இலங்கை நாடக வரலாற்றில் இதுவரை காலமும் மேடை நாடகங்களை மேடையேற்றி விட்டு பின்புதான் அவற்றை நூலாக வெளியிடுவது வழக்கமாக இருந்து வந்தது. ஆனால் முதன்முறையாக சிலோன் யுனெட்டேட் ஆர்ட் ஸ்டேஜ் அமைப்பின் தலைவரும் இயக்குனருமாகிய கே. செல்வராஜா இந்த நாடக நுாலை எழுதி வெளியிட்டு அண்மையில் இந்த நாடகத்தை மேடையேற்றி இருக்கிறார். இவரது இந்தப் பணி போற்றுதற்குரியது.

நீண்ட இடைவெளிக்குப் பின் வத்தளை ரசிகர்களுக்கு ஒரு சிறந்த நாடகத்தை கண்டு களிக்கக்கூடிய வாய்ப்பு கிடைத்தது. நல்லது, கெட்டது: உண்மை, பொய்: மேல், கீழ்: உள்ளே, வெளியே என இந்த உலகில் இருக்கின்ற அனைத்துக்கும் இரண்டு பக்கங்கள் இருப்பதுபோல ஒரு நாணயத்திற்கு எப்படி இரு பக்கங்கள் இருக்கின்றனவோ அதேபோல் இந்த நாடகத்தின் கதாநாயகனுக்கும் இரு பக்கங்கள் இருப்பதை நன்றாக புலப்படுத்தியது. இந்த நாடகத்தில் நடித்த அனைத்து நடிகர்களினதும் நடிகைகளினதும் நடிப்பு நன்றாகவே இருந்தது. மேடை நாடகங்கள், தொலைக்காட்சி நாடகங்கள் ஆகியவற்றில் நடித்து பாண்டியத்தியம் பெற்ற நடிகர் சுதாகர், நடிகை சாந்தி பானுஷா, பிரியா, ஜி. ஜே. ராஜ், இளங்கோ, ஏ. எல். ராஜா, பொன். பத்மநாதன் ஆகிய அனைவரினதும் நடிப்பு பாராட்டத்தக்க விதத்தில் இருந்தது. கலைவாணி இசைக்குழுவின் இசை அமைப்பாளர் சந்திரதாஸின் இசை வழங்கலும் பிரபல கலைஞரும் ஊடகவியலாருமான ராதா மேத்தாவின் ஒலி, ஒளி அமைப்புகளும் அறிவிப்பாளர்களான சீதாராமன், ஆர். எஸ். கேதீஸ்வன் ஆகியோரின் அறிவிப்பும் சிறப்பாக இருந்தது.